Paraguay-in Tel Aviv-ah embassy sawn let dawn

Paraguay chuan Israel rama a embassy, Tel Aviv aṭanga Jerusalem-a a sawn tawh chu Tel Aviv-ah bawk sawn let leh a tum.

US sorkarin Tel Aviv aṭanga Jerusalem-a a embassy a sawn hnuah Paraguay hian a embassy hi a sawn ve a, mahse Paraguay sorkar thar chuan embassay hi a sawn let leh dawn tih a sawi. Paraguay Foreign Minister Luis Alberto Castiglioni chuan Middle East-a remna leh muanna a awm theihna turin Paraguay chuan a theih anga tha lo thawh ve a duh a ni, a ti.

Hetih lai hian Israel chuan Paraguay sorkar thutlukna chhan let nan hian Paraguay-a a embassy a khar tur thu a puang nghal a, an ram ambassador pawh an ko let nghal nia sawi a ni.

Palestinian-te chuan Paraguay sorkar thutlukna siam chu lawmawm a tih thu a sawi thung a, embassy pawh an hawng nghal dawn niin Palestinian Foreign Affairs Minister Riyad al-Maliki chuan a sawi.

Kumin May thla khan Paraguay President hlui Horacio Cartes chu thuneihna a chan laiin embassy hawng tur hian Jerusalem-ah hian a zin a ni. Mahse amah thlaktu, Mario Abdo Benitez chu August thla khan lakluh niiin, president kalchhuak ta thutlukna siam hi a sut leh nghal a ni.

Israel Prime Minister Benjamin Netanyahu chuan US-in Israel khawpui atana Jerusalem pawm a, a embassy pawh Tel Aviv-a a sawn chu ram dangte pawhin zui ve se a duh thu a sawi. Mahse US thutlukna siam hian Palestinian te a ti thinur hle a, hmun hrang hrangah lungawi lohna pawh an lo lantir fo tawh a ni.