US-a state pakuaah hri kai an pung chak

US-ah state pakuaah tunhnaiah Covid-19  kai an pung chak hle, ni sarih chhung chu heng state-ah hian hri kai hmuh belh tam ber ni an thleng a ni. 

Hri kai pun tamna state te chu -  Alabama, Arizona, Florida, Nevada, North Carolina, Oklahoma, Oregon, South Carolina leh Texas-te an ni. US hi Covid-19 kai tamna leh he hri vanga thi tamna ber ram a la ni chhunzawm zel. Worldometers-in a tarlan danin nimin thleng khan US-ah hian hrikai hi mi 22,34,475 an tling tawh a, he hri vanga thi hi mi 1,19,941 an awm tawh bawk. 

Hri kai pun belh zel mah se state 50-te chuan hri leng vanga khuahkhirhna an siamte chu an thlahdul ṭan tawh a ni. Sumdawnna hmunte hawn chhoh mek a nih avangin hri hi a darh zual zel leh a hlauhthawnawm hle. 

Hetih lai hian president Donald Trump chuan state eng emaw zatah hri kai pun belh zel mah se, ram pumah inkharkhipna kalpui a ni tawh dawn lo tih a sawi. Hemi hma hian White House economic adviser Larry Kudlow leh treasury secretary Steven Mnuchin te pawhin an ram economy khar theih a ni tawh lo tih an lo sawi tawh bawk.