Nepal Parliament -in map thar pawm ta

Nepal Parliament upper house, National Assembly-ah nimin khan ram political map thar siam chu lungrual taka pawm a ni. 

He map tharah hian Nepal leh India ramri, ram pahnihten neitu zawk nih an inchuh buai ram hmun pathum, Lipulekh, Kalapani leh Limpiyadhura chu Nepal ram chinah rin luh a ni. 

Kar liam ta Inrinni khan Parliament lower house chuan map thar telhna, Constitution Amendment Bill hi a lo pawm tawh bawk. Nimina upper house-a bill pharh a nih hian member 57 chuan an vaiin a thlawp lamah an vote a ni. House pahniha pawm a nih tak avangin President pawmpuina chauh a ngai tawh a ni. 

India chuan Nepal political map thar siam hi a sawisel a, ram inchuh lai pathum an rin luhna turah hian thudik behchhan tur engmah a nei lo tiin, ram pahnihten ramri buaina inbiakna hmanga chinfel an lo remtih tawh palzutna a ni, a ti. Hetih lai hian Nepal prime minister KP Sarma Oli chuan inbiakna hmangin India-in an ram a luahsak chu laklet a ni dawn tih a lo sawi fo tawh thung.