New Zealand PM-in khuahkhirhna thar vangin A pasal neih tur a ṭhulh

New Zealand prime minister Jacinda Ardern chuan an ramah Covid Omicron variant kai an pun avangin khuahkhirhna khauh zawk an siam a, hei hian amah ngei pawhin a pasal neih tur chu a ṭhulh phah rih a ni.

Prime Minister Ardern chuan nimin khan hemi chungchang hi sawiin, "Kan inneihna tur pawh kan kaltlang pui dawn rih lo a ni," a ti. Khuah­khirhna siam tharah hian puipunnaah vaccine dose kima la tawh mi 100 chin bak tel phal a ni lo.

"Hri leng vanga New Zealand mipui tam tak tawn ang ka tawng ve a, hemi kaihhnawih avanga buainaa inbarh lutte chungah pawh in mi ngaihdam ka dil a ni," a ti.

Khawpuia inneihna hun hmang tura zin chhungkaw zinga mi pakua te chuan Omicron an kai a, flight attendant pakhat pawhin a kai a, hei vang hian New Zealand chuan inkhuahkhirhna "red setting" chu nizan zanlai aṭanga hman turin a tichhuak a ni. Omicron hi Delta variant aiin inkaichhawn a awlsam zawk a, mahse mipui zingah harsatna lian tham tawk an tlem zawk thung. Vantlang mipui punkhawmna tihtlem tumin, public transport leh dawra kal turte chu hmai tuamna vuah vek tura thupek an ni.

PM Ardern leh a pasal hual Clarke Gayford-te hian an inneih hun tur la puangzar lo mah se, tun kar chho hi an tum nia sawi a ni. Mahse khuahkhirhna an hman thar hi tun thla tawp thlenga kalpui tura tih a nih avangin, an ruahman angin an kal thei dawn ta bik lo a ni.

An inneih hun an sawn chungchanga a ngaihdan an zawhna chhangin, Ardern chuan khawvel kalphung a nih tawh avanga pawm mai a ṭul thu a sawi. "Hripuiin a nghawng New Zealand mi sang chuangte nen danglamna kan nei lo a, kan hmangaihte'n enkawl an mamawh lai taka an kianga kan awm ve thei lo hian rilru a ti na. Ka hun tawn tawha lungchhiat thlak ber pawh a ni thei hial dawn a ni," a ti.

New Zealand-ah hian hripui len tirh aṭangin Covid-19 kai hmuhchhuah tawh mi 15,104 leh thihpui mi 52 an awm tawh a ni. Kum hnih liamta chhunga hun tam zawk chhung khan ramriah khuahkhirhna khauh tak leh inkharkhip kalpui a ni bawk.