Winter Olympics neih hmain Beijing-ah mi mtd 2 Covid test nei dawn

Winter Olympics ṭan nan kar hnih chiah hun a awm tawh tihah, Beijing khawpui official-te chuan Pathianni khan khawpui chhung leh a chhehvela hri darhna laia cheng mi maktaduai hnihte chu hri an kai leh kai loh test vek an nih tur thu an sawi.

Thuneitute'n tunhnaia coronavirus pun chhan chu lehkhathawn kaltlanga darh a nih theih thu an sawi hnu lawkah, China postal service chuan an hnathawkte chu rampawn aṭanga bungrua rawn lutte chu disinfectant hmanga kap thianghlim leh vek turin thu an pe.

Hetih lai hian WHO leh US Centers for Disease Control chuan kan thil khawihna aṭanga hri kan inkaichhawn theihna a hniam thu an sawi thung

China hian khawvel ram dang ang bawkin hri inkaichhawn awl tak Omicron variant vangin hri kai an pun belh a, kar liamta chhunga Beijing khawpuia hri kai thar 30 vel hmuhchhuah an ni. Khawpuia hri darhna hmunah te hian "zero Covid" policy khauh tak kalpui niin, khawvel huapa an inthlahdul chhoh laiin thuneitute hian khauh zawka khuahkhirhna kalpui an thlang zawk a ni.