SAfrica President hlui manna thupek tichhuak

South Africa court chuan an ram president hlui, Jacob Zuma chu eiruk thubuai a neih mekah pre-trial hearing neih tura a inlan loh avangin Thawhlehni khan manna tur thupek a tichhuak. 

Kum 77 mi, Jacob Zuma hi president a nih lai, kum 1990 chhoa  ralthuam lei chungchangah sum tam tham tak eiruah puh a ni. 

Zuma lawyer-te chuan president hlui hi a dam loh avang leh, ram pawn lam damdawi-ina enkawl mek a nih vangin Thawhlehnia pre-trial hearing neihnaah hian a inlan thei lo tih an sawi. 

Pietermaritzburg High court chuan Zuma a damlo tih chu an pawm tih sawiin, mahse court chuan finfiahna ṭha tak a phut tih a sawi. Zuma enkawltu  leh lehkhaa a hming ziaktu doctor chu regular doctor a ni ngei em tih pawh a chiang lo niin a sawi. State prosecutor, Billy Downer pawhin court-a Zuma a inlan lo chu  'criminal offence' a nih thu a sawi bawk. 

Zuma lawyer, Dan Mant­sha chuan court chuan khaw­ngaihna leh hriatthiamna a nei lo tih sawiin, Zuma a dam ṭha lo tih hre reng chunga arrest warrant tihchhuah a ni chu mak a ti tih a sawi. Zuma chu a dam ṭhat veleh court-ah chuan a inlan ngei dawn a ni, a ti.