Brazil president candidate chemin vit

Brazil President thlanna neih tura Social Liberal Party (PSL) candidate, Jair Bolsonaro chu Ningani khan Minar Gerais-a campaign rally a neihnaah chema vih a ni a, damdawi-ina zai nghal niin a dinhmun pawh a ṭhat chhoh thuai beisei a ni.

PSL candidate Jair Bolsonaro hian chi inthliarna lam hawi leh mahni anpui kawp huatna lam thu a sawichhuah tawh avangin mi tam tak lung a ti awi lo hle. Mahse tunhnaia President thlan tur chungchanga mipui ngaihdan lakah a che ṭha chho hle a ni.

Poll buatsaihtute chuan thla thara president thlanna neih turah hian President hlui Lula da Silva chuan inthlan chuh an khapsakna chu a suttir theih loh chuan Bolsonaro hi vote hmu tam ber tura rin a nih thu an sawi.

Jair Bolsonaro hi Juiz de Fora khuaa campaign rally a neih laiin chema vih a ni a, car-ah hruaiin damdawi-in lam panpui nghal a ni. A fapa Flavio chuan a pa an vih tirh hian a hliam chu a nasa lo tiin a sawi a, mahse a hnu darkar hnihah an rin aia a lo nat thu sawiin, a pa hian thisen a hloh nasa hle a, damdawi-in an thlen hian a thi hman ṭep niin a sawi. Mahse doctor-ten rang takin an lo zai nghal a, darkar hnih chuang zet an zai hnuah a ziaawm chho leh tih sawiin, apa tana ṭawngṭai sak tur hian a ngen nghal bawk. Bolsonaro hi damdawi-inah hian ni 10 tal enkawl zui a la ngai ang.

Police-te chuan pawikhawihtu nia rin, kum 40 mi Adelio Obispo de Oliveira chu man nghal a nih thu an sawi. Oliveira hi rilru lama harsatna nei ania a lan thu an sawi bawk. Police-ten an lak hma hian Bolsanor thlawptu mipui thinrim chuan kut an lo thlak hman a ni.

President candidate dangte pawhin Bolsonaro vih a ni chu an dem thu an sawi a, Workers Party candidate-a Lula da Silva thlaktu tura rin, Fernando Haddad chuan he pawikhawihna thleng hi thil zahthlak ta a nih thu a sawi.

President Michel Temer pawhin Bolsonaro beih a ni chu a dem thu leh, hetiang pawikhawihna thleng hi an ngaihzam mai dawn loh thu a sawi. Bolsonaro pawh a ṭhat chhoh thuai a beisei thu a sawi bawk.

Bolsonaro hi a thusawi duh dan avangin dem a hlawh fo tawh a ni. Kum 2011 khan Playboy magazine hnenah fapa, mahni anpui kawp chu nei se a hmangaih theih a rin loh thu a sawi a, hetiang fapa a neih chuan accident-in boral mai se a tih zawk thu a sawi. Kum 2015 khan chanchinbu pakhatin a kawmnaah Congresswoman Maria do Rosio chu a hmelchhiat em avangin pawngsual tlak pawh a ni lo tiin a sawi bawk. Afro-Brazilian-te chungchangah chi inthliarna lam hawi a sawi avangin chhui mek a ni bawk.