Ram 171-ah Omicron hmuchhuak tawh ; Khawvel huapah Delta thlaktu la ni thuai dawn : WHO
World Health Organisation (WHO) chuan Covid-19 Omicron variant hri thar chu khawvel ram 171-ah hmuhchhuah a nih tawh thu an sawi.
WHO technical brief thar berah chuan, awlsam taka inkaichhawn theih Omicron variant chu khawvel huapa darh mek Delta thlaktu ala ni thuai dawn tih a tarlang. "January 20 thleng khan Omicron variant hi ram 171-ah hmuhchhuah a ni tawh. Variant thar hian ram tam takah Delta chu a luahlan tawh a, region zawng zawngah hri kai an pun phah bawk a ni. Omicron hi Delta aiin inkaichhawn a awlsam zawk a, rampumah chak takin Delta a thlak mek a ni," tiin a tarlang.
Omicron hian taksa lamah harsatna liantham thlen lo angin sawi mah se, WHO chuan taksaa harsatna a thlen theihna chu ala tlakhniam loh thu leh puipunna hmuna inkaidarhna chu Covid variant dang zawng aiin a sang zawk tih an sawi. SARS-CoV-2 variant hmasa te aia natpui leh thihpui tlem zawk mah se, inkaichhawng an tam em avangin hri kai damdawi-in panpui ngai pawh an pung chho leh a ni," a ti. Ram tam zawkah health care system-ah indaih lohna lian tak an tawk mek a, hei vang hian hri kai pawh an pun belh theih bakah, taksa chak lo leh natna benvawn neite chungah harsatna lian zawk a thlen theih thu a sawi bawk.
WHO chuan, "Omicron variant hian mihring taksa peng pawimawh tak, bronchus tissue chu Delta aiin a khawih chhe rang zawk a ni," an ti. Technical brief hian Omicron sub-variant dang pawh a awm belh theih thu sawiin, BA.1 lineage hi a darh zau ber a, tunhnaia India, South Africa, UK leh Denmark-a hri leng dinhmun thlirin BA.2 chu chak takin a darh mek tih WHO chuan a puang. Hri inkaichhawn pun chhan leh BA.2 inkungkaihna chu uluk taka zirchianna neih mek a ni a, mahse tun thleng hian hmuhchhuah mumal neih ala ni lo thung.
"BA.2 ziarang zirchianna kalpui a ngai a, BA.2 leh BA.1 in an lohna hrang hrang heng, inkaichhawn a awlsam dan te, taksaa kan natna dotu khawl a pumpelh theih dan te leh hriin taksa a nghawng nat zawngte enfiah a ni ang," tiin WHO brief chuan a sawi.