NKorea-in military parade huaihawt
North Korea ram chuan nimin khan an ram kum 70-na champha lawmin, a lawmna pui ber Pyongyang-ah military parade ropui tak a buatsaih a, mahse parade-ah hian US kap pha tura ngaih leh ramdangte ngaihven hlawh tak intercontinental ballistic missile (ICBM) erawh pholan a ni lo.
Military parade leh mass rally hi Pyongyang-a Kum Il Sung Square-ah neih a, section pahnih - civilian leh military-ah ṭhen a ni. Military section-ah sipai sang tel inlanin, kum 1948 aṭanga tun thlenga North Korea sipaite uniform hrang hrangte an rawn inbel a ni.
Tun ṭuma parade-ah hian ṭum danga an kalphung ang lo takin NKorea hotu ber Kim Jong-un aiah ceremonial head of state Kim Yong Nam-a'n thu a sawi thung. Kim chuan sipaite chu indona a thlen thulha inpeih thei tura inbuatsaih reng turin a chah a, hemi rual hian economy lama an ram hmasawnna tura hma la tura inpeih turin a chah tel nghal bawk.
Kim Il Sung Square-a parade hi NKorea hotu Kim Jong-un leh a senior official te bakah, China President Xi Jingping-a special envoy Li Zhanshu-te'n an thlir a ni.
NKorea hian a kum 70-na champha lawmna pual hian Inrinni zan khan conceter a buatsaih bawk a, he hunah hian jounalist-te chu sawm an ni. Concert-ah hian NKorea chanchin tarlana hla leh lemchan hrang hrangte buatsaih a ni a, missile leh nuclear weapon lampang sawilan engmah a awm lo.