Egypt-in mi 75-te thi tura hremna pe

Egypt court chuan kum 2013-a security force leh President aṭanga paihthlak Mohamed Morsi-a thlawp­tute inkara buaina nasa tak chhuak thubuai chhuina kalzelah kar kalta Inrinni khan mi 75-te chu thi tura hremna a pe.

Human Rights group Amnesty International chuan mi 75-te hremna pek chungchang chu sawisel nghalin, rorel dan lem tak a ni, a ti.

Court-in thi tura hrem­na a pek zinga tam zawk hi police-te thah leh, sorkar hmunte suasamah puh an ni. Thubuai ngaihtuahnaah hian hremna pek mi 75 zinga mi 44 te chu court-ah hian an inlan thei a, a dangte erawh chuan an awm lo chungin an chung­thu hi ngaihtuah a ni.

Thubuai siamsak zinga mi 347 te chu kum 15 tang tura hrem ni bawkin, mi 22 te chu kum 10 tang tura hrem a ni. Court hian Morsi-a fapa, Ossama chu kum 10 jail tang turin a hrem tel. Mi 215 chu kum nga tang tura hrem an ni bawk.

Kum 2013, August 14-a Cairo-a Rabaa al-Adawiya square-a sipaiten a thuneihna aṭanga an paihthlak, President hlui Morsi-a thlawptute leh security force-te inkara buaina nasa tak chhuak vang hian mi 700 vel an thi a ni. A hnuah nawrh hi huaihawt chhunzawm reng niin, nawrh huaihawt leh police inkara buaina chhuakah mi za tel an thih belh leh a ni.