Pakistan President thar lalut

Arif Alvi chu nimin khan Pakis­tan President 13-na atan rin­awmna thu tiamtira lakluh a ni ta.

September 4 khan Prime Minister Imran Khan-a ṭhianṭha tak leh rorel lai, Pakistan Tehreek-e-Insaf party dintu zinga mi, Alvi hi president atan hian thlan tlin a ni.

President kalchhuak, Man­moon Hussain chuan a kum nga term a hman zawh hnuin Inrinni khan President House a chhuahsan a ni. Hussain chuan Pakistan ram hmasawnna leh hmuingilna chu an ram danpui a nihna ang taka kenkawhnaah a innghat tih a sawi a, a term a hmang tluan chu lawmawm a tih thu a sawi bawk. Pakistan President a nih chhunga a mawhphurhnate a hlen chhuak thei chu a lawm hle tih a sawi.

President thar, kum 69 mi Alvi hi kum 2006-2013 chhungin PTI secretary general a ni. July 25 khan an ram inthlanpui neihah khan NA-247 (Karachi) bialah thlan tlin a ni a, kum 2013 inthlanpuiah pawh khan a lo tling tawh bawk. September 4-a National Assembly leh provincial assembly pali member-ten an ram president thar tur an thlannaah Alvi hian Pakistan Peoples Party candidate Aitzaz Ahsan leh Pakistan Muslim League-N candidate Maulana Fazl ur Rehman-te a hneh a ni.