WHO-in mipuite tithlabar lo turin ngen
World Health Organization (WHO) chuan novel coronavirus leng mek chungchangah, mipuite tiralkhel leh tithlabar zawnga khuahkhirna siam lo turin ram hrang hrangte a ngen.
WHO chuan ram hausate chu coronavirus chungchanga an hmalakna diktak tarlang tam turin a ti bawk.
February 3 aṭang khan WHO Executive Board ṭhutkhawm vawi 146-na chu Geneva-ah hman a ni a, he hunah hian ram hrang hrang aṭanga palai kalkawmte chuan tunlaia hri leng mek novel coronavirus an sawiho. Kar leh hian global research meeting neih tum a ni a, coronavirus rawn chhuahna nia rinna hmun apiangah research neih tum a ni.
WHO Director-General Tedros Adhanom Ghebreyesus chuan he hri zir chiang tur hian China-ah mithiamte tirh luh an nih vat tur thu a sawi. Chanchin hriat dik tawk loh avanga mipui thlabar an awm chungchang pawh Tedros chuan sawi langin, mipuiten thudik leh chanchin rintlak tak an hriat theih nan, ram hrang hrangte bakah ram hausate
chu an hmalakna dik tak tarlang tam turin a ngen nghal bawk.
"Thil pathum sawi duh ka nei a, pakhatnaah chuan WHO member ramten chanchin dik tak tarlang ṭhin turin ka ngen a, pahnihnaah chuan member ramten International Health Regulations (IHR) kalh a khuahkhirhna dan siam ringawt lo turin ka chah duh bawk. A tawp berah chuan public leh private sector-te ṭang hoin, he hri leng mek hi i do tlang ang u tih hi a ni", tiin WHO Executive Board meeting-ah Tedros chuan a sawi.
Novel coronavirus kai zinga 99% China ram chhungah niin, 1% ramdangah a ni. Hei vang hian mipuite thlabar lo turin Tedros chuan a ngen a ni.