Kim-an Trump-a hnenah summit neih leh rawt

North Korea ram hotu Kim Jong-un chuan US President Donald Trump-a hnenah lehkha thawnin, summit an lo neih tawh chu neih chhunzawm leh a rawt niin White House chuan a sawi.

US pawhin meeting neih leh hun tur hi a ngaihtuah mek niin a tarlang bawk.

White House thupuangtu Sarah Sanders-i chuan NKorea ram hotu hnen aṭanga lehkha lawmawm tak an dawn chuan NKorea-in an rama nuclear ralthuam tihbo tuma an inremna siam tawh a ngaihven zui zel tih a tilang a ni, a ti.

Sanders-i chuan Kim-a hian a lehkhathawna a sawi ber chu President Trump nena meeting neih leh ngenna a ni tih sawiin, hei hi rilru inhawng taka an lo dawnsawn thu a sawi. Meeting neih leh hun tur hi an ngaihtuah mek tih a sawi a, mahse eng hunah nge an neih dawn erawh a sawilang lo.

NKorea-in an ram kum 70-na champha lawmna puala military parade ropui tak a buatsaih pawh chu Sanders-i chuan a fak bawk. NKorea hian military parade-ah hian ralthuam hrang hrang pholang mah se, ramdangte ngaihmawh leh ngaiven tak intercontinental ballistic missiles (ICBM) erawh pholan a ni ve lo. ICBM hi US ram laili pawh kap phaa ngaih a ni.