Oct 9 aṭangin Musharraf-a thubuai ngaihtuah dawn

Pakistan president hlui Pervez Musharraf-a ram phatsantua puhna thubuai chu October 9 aṭang hian ngaihtuah ṭan a ni dawn ta.

Sorkar kalchhuak ta, Pakistan Muslim League-Nawaz (PML-N) chuan sipai hotu hlui, Musharraf-a lakah hian kum 2013 khan thuneihna a chan lai, kum 2007 November thlaa extra-constitutional emergency a puan avangin thubuai n thehlut a ni.

Member pathum awmna tribunal, Justice Yawar Ali kaihhruai chuan Dubai-a awm mek, an ram hruaitu hlui thubuai hi October 9 aṭangin nitin ngaihtuah chho turin a ti. Hemirual hian interior ministry hnenah court-a a thubuai ngaihtuah laia Musharraf awmtir a nih theih dan tura ziaka thehlut turin a ti bawk.

Justice Ali chuan prosecution lawyer Nasser-ud-Din Nayyer chu Musharraf-a statement hi video link kaltlanga record a nih theih dan ngaihtuah pui turin a ti bawk a ni.

Musharraf-a hian kum 2016, March 18 khan inenkawl turin Dubai a pan a, Pakistan-a kir leh a tiam a ni. Supreme Court thupek anga ramdanga kalchhuah khap list, Exit Control List aṭangin a hming paih a nih hnuah rampawn lamah hian a zinchhuak thei ta a ni. Mahse Dubai a pan hnuah hian special court chuan dan bawhchhiaah puangin, a thil neihte hrensak turin thupek a tichhuak a ni.

Court-a inlan turin Musharraf-a hi ṭum eng emaw zat koh ni mah se, security chhuanlamin Pakistan-ah hian a kir duh lo a ni. A ukil Akhar Shah chuan president hlui hi venhimna lam duhkhawp tawk loh avangin a inlan thei lo tih a sawi a, a hriselna a ṭhat tawk loh bawk avangin Dubai-a doctor-te chuan zinchhuah hi an remti lo niin a sawi bawk. Sorkarin President-level security a pek theih hunah court-ah hian a inlan thei chauh dawn a ni, a ti.

General Musharraf hian kum 1999 khan prime minister Nawaz Sharif-a kaihhruai sorkar paihthlain thuneihna a chang a, kum 2008 thleng ro a rel zui a ni.