Burkina Faso sipaite'n civil sorkar paihthla President Kabore awmna chin hriat a ni lo

Burkina Faso ram president Roch Kabore leh a kaihruai sorkar chu sipaiten paihthlain, President hi an hreng zui a, a awmna chin hi hriat a ni lo.

Hei hi kum khat chhunga West leh Central Africa lamah sipaite chakna hmanga sorkar paihthlak a awm ṭum lina a ni. Burkina Faso ṭhenawm, Mali ramah hemi chhung hian ṭum hnih sipai chakna hmangin paihtlak a ni hman bawk.

Thawhṭanni zan khan Lieutenant Colonel Pual-Henri Sandaogo Damiba kaihhruai sipai, Patriotic Movement for Safeguarding and Restoration intite chuan an ram television-ah an kutah thuneihna a awm tawh tih an puang Sorkar leh national assembly ṭhiah a ni nghal a, ram danpui pawh titawpin zan lam curfew an puang nghal bawk.

Kum 2020-a a term hnihna tura President atana thlan, Kabore hi a awmna chin hriat a ni lo. Sipai thupuangtu chuan an mi mante lakah tharum an hmang lo a, hmun him taka hren an ni tih thu chauh a sawi a ni.

Burkina Faso sipaite hian al-Qaida leh Islamic State (IS) firfiakte nena inzawm­na nei, an rama helpawl an beih letna kawngah President Kabore hian a thlawp ṭha lo hle nia sawiin a hma aṭangin a chungah an lungawi lo a ni. Ram chhungah pawh hun eng emaw chen chu President ban phut hian nawrh huaihawt a lo ni tawh bawk. Kum 2015 aṭang khan helho kut tuarin mi 2,000 chuang an thi tawh a, mi maktduai 1.5 vel chu an tlanchhe tawh bawk. Hmun tam takah school pawh an hawng ngam lo a ni.

Ram hrang hrangte chuan sipai chakna hmanga sorkar paihthlak a ni chu an dem thu an sawi. United Nations hotu Antonio Guterres pawhin sipaite chet dan a dem thu sawiin, sipai hotute chuan ralthuam chelek loin, President leh an ram sorkar himna chu ngaihtuah turin a ti a ni. US pawhin sipaite chu civil sorkar hnenah thuneihna pe leh thuai turin a ti bawk.