Italy Parliament-in President thar tur thlang ṭan
Italy Parliament inhnihte chuan Thawhṭanni khan February 3-a a term tawp tawh tur president ṭanglai Sergio Mattarella thlaktu tur thlanna an nei ṭan
Grand elector mi 1,008 te chuan president hi an thlang thei dawn a ni. Thlang thei turte hi Parliament member zawng zawng bakah regional council-te aiawh mi 58 an ni.
Italy danpui hnuaiah hian President thar tur thlanna hi round li-a neih tur a ni. Round hmasa pathumah two-third majority hmuh a ngai a, a round linaah chuan simple majority, vote 505 chin hmuh a ngai a ni. Thawhṭanni khan ballot-in vote hi thlak ṭan a ni.
Prime minister hlui Silvio Berlusconi chuan kar liamta Inrinni khan candidate a nihna aṭangin a inhnukdawk tih sawiin, Prime minister ni lai Mario Draghi chu tling thei tura hming langsar deuh a ni.
President thar hi Italian Republic-a president 13-na tur a ni ang. President hi Superior Council of the Judiciary leh Supreme Council of Defence hotu lu ber a ni. President hian cabinet-in chamber-ah rintawkna a neih tawh loh avanga an ban hnuah, member of parliament te'n hotu thar turah inremna an siam thei lo a nih chuan president hian Parliament hi ṭhiatin, general election thar kalpui tura thu pein, prime minister candidate tur a thlang thei a ni.