Pakistan Supreme Court-a hmeichhe judge hmasa ber ruat

Pakistan chuan Thawhṭanni khan an ram Supreme Court-a hmeichhe judge hmasa ber turin kum 55 mi, Justice Ayesha Malik a ruat.

Commission-in Supreme Court judge atana a ruat hnuah, justice Ayesha Malik hi an tihdan phung angin lakluh a nih lai hi live TV kaltlanga pekchhuah a ni a, Chief Justice Gulzar Ahmad chuan rinawmna thu a tiamtir a ni.

Prime minister Imran Khan chuan, "Hmeichhe zinga Supreme Court judge ni thei hmasa ber Justice Ayesha Malik ka lawmpui tak zet che. Ka ṭawngtaina leh duhsakna sang ber ka hlan che a ni" tiin twitter kaltlangin lawmpuina a hlan.

Supreme judge thlangtu, member pakua awmna body hian nikum khan Ayesha kaisanna tura rawtna lut chu an lo hnawlsak tawh a, kuminah erawh vote tlaah 5-4 a hnehna changin, pawm a ni ta a ni.

Lawyer group ṭhenkhat chuan he thutlukna hi sawiselin, lower court-a senior judge pathum zingah pawh a lang pha lo chunga thlangchhuak luiah an puh. Judge kaisan dan tur ruangam fel tak siam turin an nawr nghal bawk.