Hri kaite enkawl nan Hydroxychloroquine leh Lopinavir/ Ritonavir A rintlak lo - WHO

World Health Organization (WHO) chuan kar liam ta Inrinni khan hydroxychloroquine leh lopinavir/ritonavir chu Covid-19 hri kaite enkawl nan a rintlak loh thu a puang chiang ta. Covid-19 hri kaite enkawlna tur atan hian hydroxychloroquine leh lopinavir/ritonavir hmanga trail neih a ni a, he damdawi pahnihte hi zirchiang turin WHO chuan March thla khan Solidarity Trial International Steering Committee a din a ni. 

He International Steering Committee hian WHO hnenah July 1-2 a WHO Summit on COVID-19 research and innovation neih zawh takah khan, an zirchianna aṭangin heng damdawi pahnihte hi a rintlak tawk loh thu an tarlang a ni. An zirchiannaah chuan heng damdawi pahnihte hian Covid-19 vanga thihna a tih tlem phah loh thu an tarlang a, damdawi pahnihte hi International Steering Committee chuan hri kaite enkawl nan hman chhunzawm zel lo turin WHO chu a hriattir zui ta a ni.

WHO-in a tarlan danin, kar liam ta Inrinni khan khawvel pumah hri kai hmuh chhuah thar mi 2,12,326 an awm a, Covid-19 a len hnuah khawvela ni khatah hri kai thar an tam ber ni a thleng a ni. Hri kai hmuh chhuah thar zingah hian US-ah mi 53,213 leh Brazil-ah mi 48,105 an awm. Southeast Asia bialah kai thar mi 27,947 an awm bawk. 

Worldometer ina tarlan danin, nimin thleng khan khawvel pumah Covid-19 kaimi 1,14,00,034 an awm tawh a, an zinga 5,33,874 in an thihpui tawh a ni. Hri kai zinga 64,52,976 erawh an dam leh tawh thung. US chu hri kai tamna leh he hri vanga thi tamna ber ram a la ni chhunzawm zel a, hri kai hmuh tawh hi mi 29,35,993 awmin, an zinga  1,32,318 in an thihpui tawh a ni. Brazil, Russia India, Peru,  Spain, Chile, UK, Mexico leh Italy-te chu hri kai tam zualna ram 10-ah an tel bawk. 

Mexico ramah Covid-19 vanga thi an pung chak hle a, Inrinni khan he hri vanga thi hi mi 523 awmin, hripui vanga thi tam lamah France ram an pel tawh a ni. 

Health ministry chuan hri kai hmuh chhuah tawh hi  2,53,165 awmin thihpui 6,914 an awm tawh tih a sawi a, khawvela Covid-19 vanga thi tamna ram panga a ni tawh.Deputy health minister Hugo Lopez Gatell chuan hri kai zat hi official report hian a taka an la tam zawk hle rin a nih thu a sawi.