Covid-19 chhui chiang turin China-ah zin dawn
WHO chuan Covid-19 hri lo chhuah dan chanchin kimchang zirchiang tur leh, mihringa he hri lo darh chhoh dan zir chiang turin tun kar hian China ramah team a tir dawn thu a tarlang.
An zir chian hun chhung tur hi thla ruk aia tam a ngai dawn a, WHO chuan kumin January thla khan China hnenah an rama zin lut turin international expert team tirh an nih dawn thu a lo hriattir tawh bawk a, hei hi China chuan a remti a ni.
WHO Director General Dr Tedros Adhanom Ghebreyesus chuan WHO-in China-a Covid-19 hri ṭobul chhui leh zirchiang tura team a tirh theih dawn avanga a lawm thu a sawi a, he hri hi hriatchian a nih chuan a inven dan tur bakah nakin zel thlenga hmalak dan tur hriat a tih awlsam dawn thu a sawi.
Covid-19 hri darh chhuah dan chungchangah hian US President Donald Trump leh Secretary of State Mike Pompeo chuan China-a laboratory aṭanga rawn darh chhuak niin an sawi thung. He hri darh chhuah dan kimchang hi chiang taka sawi thei an la awm lo a, rin dan hrang hrang a awm karah zirchiang tura WHO-in team a tir tur hi thu lawmawm a ni.