Khawvel pumah Covid-19 kai mtd 357.9 awm tawh

Khawvel ram hrang hrangah Covid-19 kai an la pung thar mek zel a, hri kai hmuh chhuah tawh hi maktaduai 357.9 an awm tawh a, hri vanga thi chu maktaduai 5.61 chuang awm tawhin, vaccine la mi tluklehdingawn 9.85 chuang an awm tawh niin Johns Hopkins University chuan a tarlang.

University-a Center for Systems Science and Engineering (CSSE)-in nimina thuchhuak thar ber a tihchhuahah, khawvel huapah hri kai hmuhchhuah tawh mi 357,963,895 leh thihpui 5,614,043 awm tawhin, vaccine dose 9,850,294,423 semchhuah a ni tawh.

United States chu hri kai leh thihpui tam berna ram a la ni chhunzawm zel a, hri kai hmuhchhuah mi 72,171,208 leh thihpui 8,71,937 an awm tawh a ni. India chuan dawtin hri kai mi 4,00,85,116 leh thihpui 4,91,127 an nei tawh a, Brazil chu pathumna niin hri kai 24,342,322 leh thihpui 6,24,129 an awm tawh a ni.

CSSE tarlan danin, hri kai maktaduai nga chuang hmuhchhuah tawhna ram te chu France (17,420,531), UK (16,158,212), Turkey (11,090,493), Russia (11,055,246), Italy (10,212,621), Spain (9,395,767), Germany (8,956,528), Argentina (8,041,520), Iran (6,267,559) leh Colombia (5,780,910)-te an ni. Hri vanga thi nuai khat chuang awm tawhna ramte chu Russia (3,20,844), Mexico (3,03,301), Peru (2,04,404), UK (1,54,873), Indonesia (1,44,247), Italy (1,44,343), Colombia (1,32,737), Iran (1,32,274), France (1,30,483), Argentina (1,19,703), Germany (1,17,006), Ukraine (1,06,047) leh Poland (1,04,097) te an ni.

Second thum chhungin hri kai thar mi 100 zel awm : WHO

World Health Organization (WHO) chuan kar liam ta chhung bik khan khawvel pumah chawhrualin second thum danah Covid-19 kai thar mi 100 vel zel awm ang an nih thu sawiin, hri leng chuan min la kiansan mai dawn lo tih a sawi.

WHO Executive Board session vawi 150 hawnnaa a thu sawiah, UN health agency hotu Tedros Adhanom Ghebreyesus chuan hripui leng vanga kan hmachhawn theih thilte leh a tawp theih dan tur te sawilangin, Omicron hi variant thar kan hmuh tawpna a nih a rin loh thu a sawi bawk. "Omicron hi variant hnuhnung ber leh hri leng tawpna tur a ni dawn tih sawi lawk a harsa hle a ni," a ti.

WHO Director-General chuan Omicron hmuhchhuah aṭanga kar kua a liam hnu lawkah, hri kai thar maktaduai 80 chuang hmuhchhuah a ni tawh a, kum 2020 pumpuia kan report ai pawhin a tam tawh zawk tih a sawi bawk.

US-a naupang mtd 10 chuangin Covid-19 kai tawh

Covid-19 hmuhchhuah anih hnuah United States-a naupang maktaduai 10 chuangin hri hi an kai tawh tih American Academy of Pediatrics (AAP) leh Childrens Hospital Association thuchhuah chuan a tarlang.

Kumin January 20 thleng khan US-ah naupang Covid-19 kai 10,603,034 an awm tawh a, ramchhunga hri kai tawh zat aṭangin 18.4% a tling phak tih report an tihchhuahah an tarlang a ni.

US-a Omicron variant darh chhung hian kum naupang lam zingah Covid-19 kai hi an pung nasa hle. Kar hmasa khan Covid-19 kai thar mtd 1.1 chuang awm thar lehin, nikum thlasik ai khan a let nga dawnin an pun belh a ni. A kar hmasa leha hri kai thar 9,81,000 aṭanga a punna hi 17% niin, kar hnih liamta ai khan a letin a pung tih AAP chuan a sawi. Kar hnih liam ta chhung khan Covid-19 kai thar mi mtd hnih chuang hmuhchhuah an ni. Tihian kar 24 chhung chu a zawnin naupang zingah Covid-19 kai nuai khat chuang hmuhchhuah ziah an ni tawh. Nikum September thla tir aṭang khan naupang zingah hri kai thar mtd 5.6 chuang an awm tawh a ni.