Taksaah darkar 21 chhung Omicron nung, plastic-ah ni riat chhung dam thei : Study

Japan-a Kyoto Prefectural University of Medicine researcher-te'n zirchianna aṭangin, Omicron variant te hi kan vun(skin) leh plastic-ah variant hmasa heng Alpha, Beta, Delta leh Gamma-te aiin a dam rei zawk tih an hmuchhuak.

Zirchianna hi ennawn leh tura tih a ni a, BioRxiv kaltlanga tarlan a ni. An hmuhchhuah chu, Omicron hi kan vunah darkar 21 chuang a nung thei a, plastic surface-ah ni riat chhung a dam thei bawk a ni. Hei vang hian hri leng dang te aiin Omicron hi a darh chak zawk tih zirchianna chuan a tarlang.

Researcher-te hian variant dangte dam rei hun chhung an khaikhin a, chuta an hmuhchhuah chu Alpha, Beta, Gamma leh Delta variant-te hi plastic surface-ah darkar 56, darkar 191.3, darkar 156.6, darkar 59.3 leh darkar 114 ṭheuh an dam thei a ni. Hetih lai hian Omicron chu darkar 193.5, ni riat chuang a dam thei thung.

Mihring vunah chawhrualin hri dam rei zawng hi Alpha darkar 19.6, Beta darkar 19.1, Gamma darkar 11, Delta darkar 16.8 leh Omicron darkar 21.1 chhung a dam thei tih zirchianna chuan a tarlang.

Omicron hi SARS-CoV-2 variant thar ber niin, November 24, 2021 khan South Africa aṭanga hmuhchhuah a ni. Hri inkaichhawn awl tak Delta variant thlakin, khawvela hri leng darh chak ber a ni chhunzawm a, khawvel pumah hri kai mi ṭhahnem tak an awm phah mek a ni.