London police te'n Downing Street lockdown party chhui chiang mek

London police-te chuan Thawhlehni khan kum 2020 inkharkhip laia UK prime minister chenna hmuna dan loa inhmuhkhawmna nei a, party an neih chungchang chu an chhuichiang mek tih an sawi.

Metropolitan Police Commissioner Cressida Dick chuan London Assembly hnenah chhuichianna hi kalpui a nih tawh thu leh Scotland Yard chuan Downing Street-a punkhawmna thleng tam tak chu a chhuichiang mek tih a sawi.

Prime Minister Boris Johnson kaihhruai sorkar chuan ramchhungah Covid-19 vanga inkharkhip kalpui anih laia punkhawmna an huaihawt avangin sawiselna a tawk nasa hle.

Hetih lai hian Johnson chuan Thawhlehni khan kum 2020 June thlaa Covid vanga inkharkhip an neih chhungin kum 56 a tlin champha puala birthday cake party-an huaihawt avangin hekna thar a hmachhawn leh a ni.

Downing Street chuan June 19, 2020-a kum 56 tling, Johnson chu intihhlimna hmunah hian minute 10 pawh a awm tlin loh thu leh, hnathawkte chuan hun rei lo te chhung bak a piancham lawmpuina hun an hmang lo tih a sawi. Khatih hunlai kha Covid-19 hri darh mek dan chah tuma England-a inkharkhipna khauh tak kalpui a ni a, inchhungah mi pahnih aia tam punkhawm khap a ni. Mahse, ITV news chuan PM Johnson piancham lawmnaah hian mi 30 vel telin, piancham lawmpuina hlate an sak bakah cake-te pawh an sem niin a sawi.

Intihhlimna hi Downing Street-a Cabinet room-ah an ram huna chawhnu dar 2 bawr vel khan neih a ni a, hei hi a hunlaia Johnson-a nupui hual, tuna a nupui ni ta Carrie Symonds-in a buatsaih nia sawi a ni.

Symonds hian PM Johnson-a'n Hertfordshire school-a official trip a nei zawhah lo surprise-na turin a lo buatsaih sak a ni. Number 10 Downing Street thupuangtu chuan "Khami ni a Number 10-a hnathawk kalkhawmte chuan meeting zawhah Prime Minister piancham lawmpui turin Cabinet Room-ah hun rei lote chhung an kalkhawm a. PM hi minute 10 pawh a awm tling lo a ni," a ti.

PM hian a hnu lamah piancham lawmna pawh a buatsaih leh nia sawi pawh Number 10 chuan chhangin, "Thudik lo hulhual a ni. Khang hunlaia dan an siam zul zuiin Prime Minister khan an chhungkaw mi tlem nen tlaiah khan hun an hmang a ni." a ti.

Minister eng emaw zat chuan PM thlavang hi an hauhsak bawk a, UK transport secretary Grant Shapps chuan, "Prime minister piancham a ni ngei a, cake pawh pek a ni a, hei hi chanchinbu lama thlalak darh kan hmuh chu a ni. Mahse heng a staff-te hi ni dangah pawh room khata hun rei tak tak hna a thawhpuite an ni. A piancham lawmna atan room-ah lutin cake an pe ngei a, mahse an awmkhawm hi minute 10 pawh a tling lo ang," tiin a sawi.