US President Biden-a'n Russia President Putin a vau
US president Joe Biden chuan Russia president Vladimir Putin vauin, Russia-in Ukraine a rûn a nih chuan a nghawng na tak an tuar ngei dawn a, economy lama hrekna thlengin an tuar dawn tih a sawi. President Putin lakah pawh hrekna siamah a vau.
Joe Biden hian Thawhlehni khan national security team-te meeting neihpuiin, Russia chet lakdante an sawiho a ni. Hemi hnua chanchinthar lakhawmtute a kawmnaah, Biden chuan Russsia sipaite chu Belarus ramriah an la awm reng tih a sawi. "President Vladimir Putin hnenah chuan a hma pawhin chiang takin ka hrilh tawh. Ukraine an lut a nih vaih chuan a nghawng na tak a awm ngei dawn a, economy lam hrekna pawh a tel ang. Hei bakah hian eastern front lam, Poland, Romania leh hmundanga NATO sipai awm zat pawh tihpun ka tum ang, " tiin a sawi a ni.
US hian Europe-a NATO sipaite pui tura a ṭul huna che chhuak mai turin sipai 8,500-te chu inralring reng turin alo hriattir tawh. Ukraine ṭhenawm, Belarus chu Russia-in Ukraine ram beih a tumnaah a pui a nih chuan rang takin chhanna a pe nghal dawn tiin US chuan a vau tel ve bawk.
Hemi rual hian US chuan Ukraine-ah America sipai emaw, NATO sipai emaw dah luh tumna a nei lo tih Biden chuan a sawi nghal bawk.
Khawthlang ram hruaitu dangte pawhin Ukraine a rûn a nih vaih chuan Russia chuan a man a pek a ngai ngei dawn tiin an lo vau fo tawh bawk a ni.
Russia chuan Ukraine nen an inkar boruak chu US leh a thurualpui ramte chuan boruak tihchhiat tumin a nihna bakin an sawi niin a puh ve thung. Ukraine luhkhung leh, rûn tumin ruahmanna engmah an la siam lo tih a sawi. Hetih lai hian Russia hian Ukraine ramri bulah sipai nuai khat vel a dah mek thung.
US hian a hma pawhin ram dang hruaitu ṭhenkhat lakah hrekna a lo siam tawh a, an zingah hian Syria president Bashar al-Assad, Venezuela hruaitu Nicolas Maduro leh Libya hruaitu hlui Muammar Gaddafi te lo hrek tawhin, US-a an thil neihte leh sumte khawih chet theih lohin a siamsak tawh a ni. Biden chuan Russia-in Ukraine a rûn a nih chuan a mimal taka Russia President Putin hrek chu a hreh dawn lo tih a sawi.
Britain prime minister Boris Johnson pawhin Europe ramte chu Russia-in Ukraine a rûn a nih chuan Russia hrekna tur lo peih sa turin a chah. Russia-in Ukraine a rûn rual rual hian hrek nghal hi a ṭul a ni, a ti. Spain chuan Russia hian Ukraine chu sipai chakna hmanga a bei a nih chuan economy lama hrekna siamsak chu a thlawp tih a sawi.