Presidential candidate aṭangin Lula inhnuhdawk

Brazil President hlui, jail-a tang mek Luiz Inacio Lula da Silva chu thla thara an ram president thlanna neih tura candidate a nihna aṭangin a inhnukdawk a, a thla vengtu atana party-in a dah Fernando Haddad chu party candidate a ni dawn ta a ni.

Workers' Party hotu Gleisi Hoffman chuan police headquarters kawtah President hlui Lula-a thutlukna siam hi a puang.

Kum 72 mi, Lula da Silva hi thuneihna a chan laia thamna laa puh niin, a thubuaiah hian thiam loh chantir a ni a, kum 12 tang tura hrem a ni. Lula chuan court thutlukna siam hi ngaihtuah ṭha leh turin a ngen a ni. Hei vang hian an party pawhin President thlanna turah candidate atan hian a ruat lui tho a ni.

Mahse kar hnih liamtaah khan Brazil electoral court chuan Lula hi thiam loh chantir a nih avangin inthlan hi a chuh ve a khap a ni.

Lula hi jail-ah a tang mek a, amah thlawptute chu jail aṭanga chhuah tir tura phutin jail pawn lamah hian thla eng emaw zat an inkulh tawh a ni. Lula-an inthlan chuh a tum tak loh thu a ziahna lehkha hi Thawhlehni khan jail pawn lama awmkhawmte hmaah hian chhiar chhuah a ni a, a aiah Fernanda Haddad a ding zawk tur thu a sawi.

Workers' Party president candidate tur ni ta, Fernando Haddad hi education minister hlui a ni a, Sao Paulo mayor a ni tawh bawk a, hmun dangah chuan hriat a la hlawh vak lo hle. Lula chuan amah thlawptute chu Haddad-a hi vote vek turin a ngen nghal a ni. A lehkhaah hian Lula chuan dik lo takin mi chu tantir theih ni mah se, a ngaihdan leh a hmathlir neihte chu hrekbeh sak theih a ni dawn lo tih a sawi. Jail aṭang chuan an party tan theihtawpin a beih chhunzawm zel dawn tih a sawi.

Brazil President thar hi October 7 hian thlan a ni dawn a ni. Lula'n a chuh theih dawn tak loh vangin Workers' Party lamin candidate tur an tichiang thei ta chuah a ni. Far-right presidential candidate Jair Bolsonaro chu September 6 khan Juiz de Fora khuaa election rally a neihnaah chema vih niin, zai a ngai dawn nia sawi a ni.