Nawaz Sharif-a nupui a thi

Pakistan Prime Minister hlui Nawaz Sharif-a nupui, Begum Kulsoom Nawaz-i chu hun rei tak cancer natna a vei hnuah Thawhlehni khan London-ah a thi. A ruang hi Pakistan-a lain Lahore-a an chenna, Jati Umra-ah phum a ni ang.

PM hlui Nawaz Sharif, a fanu Maryam leh a makpa Captain (retd) Muhammad Safdar-te chu eiruk thubuaia thiam loh chantir an nih avangin Rawalpindi-a Adiala jail-ah an tang mek a, mahse Begum Kulsoom Nawaz-i vuinaa tel tur hian jail aṭanga an chhuah phalsak an ni. Sharif chhungkua chuan ni nga chhung chhuah phalsak turin an dil a, mahse Punjab sorkar-a home department chuan darkar 12 atan chauh an chhuah a phalsak a ni. Mahse Kulsoom-i hi Zirtawpni-ah vui a nih dawn chauh avangin sorkarin chhuah a phalsak hun hi a pawhsei sak ngei an beisei tih Pakistan Muslim League-Nawaz (PML-N) thupuangtu chuan a sawi. Punjab sorkar-a senior official pawhin Kulsoom-i vui a nih hma chuan parole hun pawh hi pawhsei a la ni dawn niin a sawi bawk.

Nimin zing khan Sharif-a leh a fanute nupa hi Rawalpindi-a Nur Khan Airbase aṭangin special plane hmangin Jati Umra hi panpui an ni.

Begum Kulsoom Nawaz-i hi term thum, 1990-1993, 1997-1999 leh 2013-2017 chhung khan Pakistan first lady a ni a, military dictator Gen Pervez Musharraf-an a pasal kaihhruai sorkar a paihthlak hnu khan kum 1999-2002 chhung PML-N president a ni zui bawk. Nawaz Sharif-a man a nih hnuah a pasal chhuah zalen a nih theih nan hian theihtawp a chhuah a ni. Kum 1999 khan house arrest-a hren a ni bawk.