Catalonia National Day hmang

Spain aṭanga inlakhran duh, Catalonia bialah Thawhlehni khan Catalonia National Day hman a ni a, a lawmna pui ber Barcelona-ah chuan mi nuai khat chuang an pungkhawm a, indepedence an duhna an lantir zui bawk.

Barcelona-a pungkhawmte hian thawmhnaw sen inbelin, Catalan flag an keng bawk.

Catalan regional president Quim Torra leh president hlui, Belgium-a tlanchhe mek Carles Puigdemont-te chuan Catalan mipuite chu independence an duhna lantir chhunzawm zel turin an ngen. Catalonia bial hian nikum khan Spain aṭanga inlakhran tumin independence a puang a, mahse Spain constitutional court chuan he hi dan kalh nia sawiin a hnawlsak a ni. Spain sorkar chuan Catalan parliament ṭhiatin sorkar laipui thuneihna hnuaiah a dah zui a, inthlan ṭhat an buatsaih nghal a ni.

Thawhlehni, September 11 kha kum 1714-a Spain lal King Philip V sipaiten Barcelona an lak champha a ni, kum riat kalta aṭang khan Catalonia bialah he ni hi indepedence an phutna lantirna kawngzawhna ni atan an hmang a ni.

Kumin July thlaa Catalonia bial mipui ngaihdan lakah, Catalan mi 46.7% chuan Spain aṭanga inlakhran an thlawp a, mahse independence duh lo hi 44.9% zet an la awm.