Nawaz Sharif-ate chhuah phal hun pawtsei

Pakistan Prime Minister hlui Nawaz Sharif, a fanu Maryam leh a makpa Capt (retd) Mohammad Safdar-te chu Nawaz Sharif-a nupui, Begum Kulsoom Nawaz-i vuinaa an tel theih nana chhuah an phalsak chu ni thum chhung atan pawhsei sak a ni.

Begum Kulsoom-i hi Thawhlehni khan cancer vangin London-ah a thi a, a thih hnu lawkah hian Adiala Jail-a tang mek Nawaz Sharif-ate hi darkar 12 chhung atan an chhuah phalsak an ni. Mahse Begum-i hi vawiin hian Lahore-ah vui a ni dawn a, hei vang hian Sharif-te chhungkua hian ni nga chhung chhuah phalsak turin an dil a, mahse Punjab province Home Department chuan ni thum chhung atan a pawhsei sak a, Inrinni zan thleng parole-a chhuah hi phalsak an ni ta a ni. Mahse a ṭul dan azirin an chhuah phalsak hun hi pawhsei sak an la ni leh thei dawn niin department thupuangtu chuan a sawi.