Philippine-ah thlipui tleh dawn vangin insawnchhuak

Philippine hmarchhak lamah Cagayan province-ah thlipui, typhoon Mangkhut a tleh dawn vangin mi sang tel chu hmun him lamah sawnchhuah an ni.

Category 4 hurricane, typhoon Mangkhut hian vawiin hian Luzon thliarkar a thlen rin a ni. Thlipui kalkawnga awmte chu theihtawpin an lo inbuatsaih lawk a, nimin pawh khan school leh office-te pawh khar vek an ni.

Philippine hi kum tinin thlipui 20 velin a nuai ṭhin. Khawchin zirtute chuan Mangkhut hi kumina thlipui tleh tawha na ber a ni tih an sawi. Thlipui hian Northern Mariana Island leh Guam-te chu darkar khata km 255-a naa tlehin a lo nuai tawh bawk. Thuneitute chuan thlipui tleh tur hian ruahtui a kentel avangin leitawlh leh tuilian te a thlen an hlauhthawn thu an sawi.

Cagayan Governor Manuel Mamba chuan tuipui kam hnaih khuaa chengte chu hmun him lamah sawnchhuah an ni tih a sawi. President Rodrigo Duterte pawhin hmarlam biala cabinet official-te chu chhiatna nasa tak a thlen palh thulhah ṭanpui hna thawk nghal thei tura inbuatsaih turin a chah. Duterte hian thlipui tleh dawn vang hian Battan province-a missile test firing neihna hmuna a kal tum pawh a ṭhulh phah a ni.