Carolina-ah Hurricane Florence a tleh

US-a North Carolina-ah thlipui, Hurricane Florence a tleh a, ruahtui a ken tel avangin kawngpuite tuiin a chim nasa a, mi tam tak chu power supply nei loin an awm bawk.

National Hurricane Center (NHC) chuan Hurricane Florence-in Carolina a thlen hian Caterogy 2-ah tlahniam tawh mah se, a la hlauhawm pha reng niin an sawi. North Carolina Governor Roy Cooper chuan thlipui tlehin ruah nasa tak a ken tel avangin an state chu tuilian nasa tak tuar mai thei an nih thu a sawi. Mipuite chu fimkhur turin a chah.

National Weather Service chuan North Carolina hian thla riat chhunga ruahtui an dawn zat chu thlipuiin a ken tel ruahsur vang hian ni hnih thum chhung leka a sur hman a rinawm tih a sawi. Thlipui kalkawnga cheng mi maktaduai 10 zinga maktaduai khat chuangte chu hmun him lama insawnchhuak tura hriattir an ni a, mi sang tel chu emergency shelter-ah an awm mek niin official-te chuan an sawi. Thlipui tleh dawn vang hian Georgia, South and North Carolina, Virginia, Maryland leh District of Columbia-ahte emergency puan a lo ni tawh bawk.