Pakistan SC-in JuD hna thawh chhunzawm phalsak

Pakistan Supreme Court chuan firfiakten Mumbai khawpui an beihnaa mawhphurtua puh, Hafiz Saeed-a pawl Jamaat-ud-Dawa (JuD) leh Falah-i-Insaniyat Foundation (FIF) te chu an hnathawhte an chhunzawm zel a phalsak.

Member pahnih awmna bench chuan Lahore High Court-i April 5-a heng pawl pahnihten vantlang tana an hnathawh chhunzawm a phalsakna, sorkarin a khin letna chu ngaihtuahin, sorkar-in High Court thupek hnawl tura a ngenna chu a hnawlsak ta zawk a ni. High Court hian Pakistan sorkar chu pawl pahnihten vantlang tana hna an thawhna kawnga lo inrawlh lo turin a ti a ni.

Pakistan sorkar hian a hmain JuD, FIF leh UN Security Council sanction list-a awmte chu mimal leh company-te ṭanpuina sum an pek alo khap tawh a ni. Saeed hi kum 2008 December thla khan UN Security Council Resolution 1267 hnuaia list siamah telh a ni tawh a, house arrest-a hun eng emaw chen hren a nih hnuah chhuah a ni leh tawh bawk a ni.

Saeed-a pawl, JuD hi kum 2008-a Pakistan firfiakten Mumbai khawpui an beihnaa a phusa ber nia puh an ni a, he pawikhawihna thlenah hian mi 166 an thi a ni.

Kum 2014 June thla khan US chuan JuD hi foreign terrorist organisation-ah a puang a, US Department of Treasury chuan Saeed chu Specially Designated Global Terrorist-ah a puang bawk. Kum 2012 aṭang khan US chuan Saeed-a chungthu relsak a nih theihna atana a chanchin kimchang hrilh thei hnenah lawmman US dollar maktaduai 10 pek a lo phal tawh bawk.