Philippines-ah thlipui tleh vangin mi 25 thi

Philippines ram chu Inrinni khan thlipui na tak, typhoon Mangkhut-in a nuai a, thlipui tlehin chhiatna a thlena thi hi mi 25 an tling.

Typhoon Mangkhut hian Inrinni chawhnu dar 1.49 vel khan Philippines hmarchhak lama Luzon thliarkra Baggao a thleng a, darkar 20 chhung vel tlehin ruah nasa takin a sur zui bawk. He thlipui hi kumin chhunga Philippines rama thlipui tleh na ber tura sawi a ni a, mahse Philippines a thlen hian a nat lam hi a ziaawm deuh hman a ni.

Thlipui kalkawngah hian mi maktaduai nga vel an cheng a, thlipui thlen hma hian theihtawpa lo inbuatsaih lawkin mi nuai khat chuang chu sorkarin awmna tura a siam lailawkah an insawn a ni.

President thupuangtu leh disaster response coordinator, Francis Tolentino chuan thi te chu Cordillera leh Nueva biala mite vek an ni tih sawiin, thlipuiin a ken tel ruahsur nasain leimin a thlena thi an ni tih a sawi. Hmun hrang hrang aṭangin thlipuiin chhiatna a thlen dan report a la lut khawm mek niin a sawi bawk.

President Rodrigo Duterte chu nimin khan an ram hmarlama thlipui tlehna bial tlawh tur hian a kal a, chhiatna thlen dante leh mipuiten harsatna an tawh dante a enfiah dawn a ni.

Thlipui tleh hian in a len chhe nasa hle a, Cagayan province khawpui Tuguegarao khuaa in zawng zawng deuhthaw chu an chhia niin sorkar official chuan a sawi. Thlai chinna hmunte pawh a chhe nasa hle. Buh leh vaimin chin te chu hmun ngaa ṭhena hmun khat vel chauh an thar thei dawn niin Tolentino chuan a sawi.

Tolentino chuan thli tleh hnuah ruah nasa taka a sur avangin tui a len mai hlauhthawnawmin a awm mek tih sawi a, thli tlehna bialte pawh ngun taka enfiah an ni, a ti.

Thlipui tleh dawn vang hian an lo inpuahchah nasa hle a, zinchhuah khap a nih bakah school te khar vek an ni a, sipaite chu a ṭul huna ṭanpui hna thawk tura che chhuak turin an lo inpeih sa bawk a ni.

Typhoon Mangkhut hian China chhim lam a pan a, a nat lam hi darkar khata km 145-ah tlahniam tawh mah se, a rawn nat leh a la hlauhthawnawm nia sawi a ni. Hei vang hian China chhim lamah dawr leh public service-te chu lo khar lawk niin, Hong Kong International Airport-ah flight 800 chuang cancel a ni bawk a, khualzin nuai khat chuang zet a nghawng a ni.