US khawchhak lam bialah thlipui Florence tleh

US khawchhak lam tuipui kam bialah kar kalta Zirtawpni khan thlipui Florence tlehin, ruah nasa takin a sur zui bawk. Thli tleh leh ruahsur nasain chhiatna a thlena thi hi mi 12 an tling tawh a ni.

Hmun ṭhenkhatah chuan ni hnih chhung lekin ruah hi 60 cm a sur hman a ni. Kawngpuite pawh tuiin a chim nasa a, tui a len mai a hlauhthawnawm niin North Carolina Governor Roy Cooper chuan a sawi.

US President Donald Trump chuan North Carolina-a county pariat chu chhiatna thlenna hmunah a puang nghal a, hemi hmang hian sorkar laipui aṭangin chhawmdawlna pawh an dawng thei dawn a ni. President hian tunkar chhung hian thli tlehna bial hi tlawh a tum niin White House chuan a sawi.