Journalist-te chhuah phutin Myanmar-ah kawng zawh

Myanmar rama tang mek, Reuters journalist pahnihte thiam loh chantir an nih vang leh hrem an nih vanga lungawi lohna lantirin Pathianni khan Yangon-ah activist leh journalist-ten kawng an zawh a, zirlai naupang eng emaw zat an tel bawk.

Myanmar court chuan tun thla tir lam khan journalist pahnih Wa Lone leh Kyaw Soe Oo te chu Rohingya Muslim-te beih an nih chungchanga an chhuihnaah State Secrets Act palzutah puhin, kum sarih tang turin a hrem a ni.

Journalist pahnihte man a ni hi ram hrang hranga activist leh journalist-ten an dem thu an sawi a, press freedom palzut sakna nia sawiin chhuah turin an phut a ni. Pathianni-a kawngzawhte hian tualthahna thleng chu ram thuruk a ni lo tih te, thudik tak hailan chu pawikhawihna a ni lo tih thu ziakte an keng a, journalist pahnihte thlalakte an pholang bawk.

Kawngzawhte chuan reporter pahnihte hian an hna tur an ti mai nia sawiin, hetianga man leh thiam loh chantir an nih chuan Myanmar ram chungchanga report pek dan thlengin a nghawng dawn a ni, an ti. Press freedom palzut chuan an rama democracy tundin tuma beihnaah an hnungtawlh leh tih a lantir a ni, an ti bawk.

Ram leh pawl hrang hrangten court thutlukna siam hi an dem thu an sawi laiin, Myanmar ram hruaitu Aung San Suu Kyi-i chuan court thutlukna siam hi a chhan thung. Suu Kyi-i chuan journalist pahnih, Wa Lone leh Kyaw Soe Oo-te chuan international law an bawhchhia a, thiam loh chantir an nihna chu freedom of expression palzutna lam kaihhnawih a ni lo, a ti. Journalist pahnihte hian a court thutlukna hi an duh chuan an appeal thei dawn niin a sawi.

Suu Kyi-i thusawi hi Myanmar-a journalist organisation paruk chuan chhang letin thuchhuah an siam a, a thusawi duh dan chuan a tilawm lo hle tih an tarlang.