Typhoon Mangkhut-in China thleng

Thlipui na tak, typhoon Mangkhut chuan Philippine ram na taka a nuai hnuah Pathianni khan China-a Guangdong province a thleng. Thlipui tlehin chhiatna a thlen vanga Philippine rama thi hi mi 50 an chuang tawh a ni.

Kumin chhunga khawchhak lam biala thlipui tleh zinga na ber nia sawi, Mangkhut hi darkar khata km 200 chuanga na ten a thleh pha a ni. Thlipui tleh dawn vang hian theih tawkin an lo inbuatsaih lawk a, mi maktaduai 2.52 chu hmun him lamah insawn tir niin, tuipuia sangha mantute lawng kalchhuak 48,000 vel pawh lawng chawlh hmunah koh kir an ni. In sakna hmun 29,000 chuangah hna chawlhsan niin, tourist spot 640 khar a ni bawk.

Nimin zing khan thlipui hian Guangxi regional capital Nanning pelin Yunna province lam a pan leh a ni.

Typhoon Mangkhut hian an ram huna Pathianni tlai dar 5 khan Guangdong province hi a thleng a, mahse China a thlen hian thli nat lam hi darkar khata km 162-ah a tla hniam hman a ni. Thlipui tleh hian thingkung tam tak a chhem tluk bakah inchungte pawh a la nasa hle.

Hurricane Florence :

US-ah pawh thlipui, hurricane Florence tleh leh ruahsur nasa vangin North Carolina state chuan harsatna a tawk chho mek. Thli tleh hian in tam tak a tichhia a, ruah a sur nasat avangin lui te pawh an lian chak hle. Thlipui tlehin chhiatna a thlen vanga thi hi mi 14 an tling tawh. Pathianni khan thlipui tleh hian ziaawm tawh mah se, ruah a la sur chhunzawm reng a ni. Tui lian vangin mi 900 chu chhanchhuah an ni a, mi 15,000 chu shelter home siamah an khawsa mek a ni. North leh South Carolina-ah in leh sumdawnna hmun nuai sarih chuang chu power nei loin an awm bawk.