Honduras-a hmeichhe President hmasa ber Xiomara Castro lalut

Leftist mi, Xiomara Castro (62) chu Honduras rama hmeichhe zinga president hmasa ber ni turin Ningani khan lakluh a ni.

President thar Castro hian lakluh a nih rual hian Honduras-a dan bawhchhiatna leh retheihna chu mipuite zalenna leh rorelna ramah thlak danglam a tiam.

Tegucigalpa National Stadium-a mipui hmaa President anga thu a sawi hmasa berah, Castro chuan social leh economic lama Honduras-in harsatna an hmachhawn hrang hrangte sawilangin; zirna, healthcare, venhimna leh hnathawh lamah hmasawnna thlen turin a intiam.

Sum lama tlachhe mek, Honduras ram chuan din thar a, vantlang kuta innghat leh mipui rorelna rama thlak danglam a tum tih a sawi. Honduras hian leiba USD tluklehdingawn 17 vel a nei mek a ni. Castro chuan leiba rulhna atan ram dang hnen aṭangin ṭanpuina USD tld 11 vel an mamawh tur thu a sawi.

President hi Judge Karla Romero chuan rinawmna thu tiamtirin a lalut a, Congress president atan Castro chuan Luis Redondo chu a ruat nghal bawk. Castro hian Ningani vek khan a cabinet turte puangin, a fapa Hector Zelaya chu private secretary, a vahpa Jose Manuel Zelaya chu defense minister atan a ruat nghal bawk a ni.

President lakluh inkhawm hi US Vice President Kamala Harris, King Felipe VI,Spain leh Taiwan Vice President William Lai te'n an hmanpui a ni.