US-Canada inrinaa vur khangin a hmeh hlumte nihna hrechhuak

United States leh Canada inrina bula mi pali ruang an chhar chu India mi an nih thu sawiin, mitthite hi Gandhinagar-a Dingucha khuaa mi an ni tih thuneitute chuan nimin khan an puang. Hemite chhungkua hi a ruka US luh tuma an kal laiin, ram pahnih inrina bula Manitoba province-ah vur hian a hmet hlum tih an sawi. 

January 19 khan Royal Canadian Mounted Police (RCMP) chuan khaw vawtin a hmeh hlum ruang pali chu Canada-a Emerson khuaah an chhar thu an sawi a. India khua leh tui dan loa ramri kaltlanga luh ruk tum mi panga dangte chu America thuneitute chuan US huamchhungah hian an man bawk a ni.

Ottawa-a High Commission of India thuchhuah tarlan danin, mitthi te hi Jagdish Patel (39), a nupui Vaishali Patel (37), an fanu Vihangi Patel (11) leh an fapa Dharmik Patel (3)-te an ni. "Vanduai thlak takin chhiat tawk mi palite ruang chu Canada-US inrinaah January 19, 2022 khan hmuh an ni a, Canada thuneitute chuan mithi e hi India mi an nih thu an nemnghet a ni," tiin High Commission chuan a sawi.