Italy President atan Sergio Mattarella thlang nawn

Italy president Sergio Mattarella chu a term hnihna turin President atan thlan nawn a ni tih Lower House speaker Roberto Fico chuan Inrinni zan khan a puang.

Inrinni liam ta khan Parliament chuan joint session neiin, President thar thalnna round riatna an zo a ni.

President thar thlannaah hian kum 80 mi, Mattarella hian vote tla 983 aṭangin 759 a hmu pha a ni. Thlan tlin a nih thu hriattir a nih hnua thu a sawiah, Mattarella chuan Parliament member leh regional aiawhten an la rin ngam avangin lawmthu a sawi.

Italy ramah hian President thlan nawn hi a thleng khat hle. Mattarella hma chiaha president dinhmun chelhtu, Giorgio Napolitano chauh kha term hnihna atan thlan nawn a la ni a, mahse hei pawh hi kum hnih a chelh tling lo a ni. Italy President hian Parliament ṭhiah, prime minister thar ruat leh ṭangrual sorkar siam tumna dan theihna turin thuneihna nei mah se, rorelna kawngah erawh chuan a thuneihna hi a hming chauh a ni thung.

President thar thlan dawn hian Mattarella hian chawlh a duh thu pawh a sawi a, mahse prime minister Mario Draghi chuan Italy ram dinhmun siamṭhatna turin a hna hi chelh chhunzawm turin a ngen a ni.