North Korea-in kum 2017 hnuah a missile chak ber enchhin leh

North Korea chuan nimin khan kum 2017 hnuaah a ṭum khatna atan an missile chak ber an enchhin leh nia sawi a ni a, tun thla chhunga missile an kahchhuah ṭum sarihna a ni bawk.

NKorea hian thla khat chhungin missile heti zata tam hi a la enchhin ngai lo.

US nena inremna siam tuma an inbiakna chawlhsan lailawk a nih mek karah, an hruaitu Kim Jong-un-a'n an armed force-te thuam chak a tumna chu chak takin an bawhzui mek. Ram dangte sawiselna leh hrekna pawisa loin, sipaite a thuam chak chho zel a ni.

South Korea chuan North Korea hian kum 2017-a peninsula-a inepna nasa tak an lo neih ṭuma a kalphung ang khan a zawm chho leh dawn nia a lan thu a sawi. South Korea president Moon Jae-in chuan Seoul-a National Security Council emergency meeting an neih hnuah, NKorea chuan inremna an lo siam dun tawh chu a tichhe teuh tawh hle tih a sawi.

Nimina NKorea-in ballistic missile a kahchhuah hi km 2,000 vel thleng kapin, km 800 vela sangah darkar chanve a thlawk kual niin South Korea Joints Chiefs of Staff chuan a sawi. Hei hi kum 2017 hnuah Intermediate-Range Ballistic Missile (IRBM) a enchhin lehna hmasa ber nia a lan thu International Institute for Strategic Studies analyst Joseph Dempsey chuan a sawi. Hetianga missile chak a enchhin hnuhnung ber chu kum 2017 kha a ni.