US-in China bungruaah chhiah lakna thar siam
US chuan China aṭanga bungrua a lakluh, dollar tluklehdingawn 200 hu-ah chhiah lakna thar a siam.
Chhiah lakna thar siam hi item 6,000 dawn an tling a, US-in ṭum khata chhiat lakna tur a siam len ber a la ni. Item zingah hian handbag, buhfai leh textile te a tel a, hetihlai hian tel tura rin smart watch leh high chair-te erawh telh an ni lo thung.
US leh China hi sumdawnna lamah an inep chhunzawm zel a, China chuan US-in an bungrua thawn luha chhiah lakna a siam thar leh a nih chuan chhan let ve ngei a lo tiam tawh a ni.
US-in chhiah lakna thar a siam hi September 24 aṭanga hman ṭan tur a ni a, chhiah lak hi 10% aṭanga ṭan niin, ram pahnihte hian insumdawn tawnna kawngah inremna an siam a nih loh chuan nakkumah 25% a tihsan a ni ang.
President Donald Trump chuan chhiah lakna thar siam chu China-in dik lo taka insumdawn tawnna a kalpui vanga an chhan letna niin a sawi. Dik taka insumdawn tawnna kalpui anih theihna atana thil thlak an duhte chu chiang takin an sawi tawh a, China pawh hun remchang pek a ni bawk a ni tiin, mahse China chuan a chin dan ṭhan chu a thlak duh lo a ni, a ti.
Chhiah lakna thar siam chu China-in a rawn chhang let a nih chuan US chuan a thawh thumna atan China thil siam dollar tluklehdingawn 267 hu-ah chhiah an lak belh leh dawn tih Trump chuan a sawi bawk. Hei hi kalpui a nih chuan China-in US-a bungrua a thawnluh zawng zawngah chhiah lakna thar hi hman a ni thei tawh dawn a ni.
Trump hian America thilsiam tihlar leh dah pawimawh hmasak chu a auhlaah a hmang ṭhin a, tuna China aṭanga bungrua lakluhah chhiah lakna thar siam a nih vang hian China thilsiam aiin America ram chhunga thil siamte chu a tlawm phah thei dawn a, America mipuite chuan an ram siam ngei an lei uar theih phah dawn a ni. Hei hian tualchhunga sumdawngte a pui thei dawn a, an ram economy thlengin a ṭhatpui phah thei dawn niin an ngai.
Hetih lai China pawhin US siam car leh motorcycle-a chhiah a lakte a tisang tawh bawk a, US aṭanga bungrua a lakluh dang dollar tluklehdingawn 60 huah pawh chhiah lakna thar a duang tawh bawk.