Pakistan-in official motor 101 a lilam

Pakistan sorkar thar chuan inrenchemna a kalpuina tur kawng khat atan Thawhṭanni khan official motor 101 a lilam a, mahse sum hmuh an beisei aṭanga hmun 10-a ṭhena hmun khat chauh an la hmu pha.

Thawhṭanni-a luxury vehicle an lilam zingah hian 61 chauh hralh a ni. Motor lilam zinga hmun li-a hmun thum hi kum 10 chuanga upa an ni a, kum 32-a upa Toyota Corolla pahnih a tel bawk. Mercedes, BMW leh Toyota Land Cruiser te pawh a awm a, bulletproof motor 27 an tel bawk. Heng motor-te hi prime minister official residence ground-ah lilam an ni.

PM Imran Khan hian a kaihhruai sorkarin inrenchemna a kalpui tur thu a lo sawi tawh a, ṭul

loa sum sen ral tam takte tihtawp a tum. An rama mirethei leh mi hausa inkar zau lutuk te chu thil zahthlak tak a nih thu a sawi. A minister leh official-te pawh thlawhtheihnaah first class-a zin lo turin a lo ti tawh bawk.