Korea ram pahnih hruaituten inremna ziak Kim Jong-un an missile site khar a remti

North Korea ram hotu Kim Jong-un leh South Korea President Moon Jae-in te chuan nimin khan thawhdunna tur inremna thuthlung an ziak.

Korea ram pahnih hruaitute hian Thawhlehni khan meeting an lo nei tawh a, nimin khan nei chhunzawm lehin summit neih tawpah inremna hi an ziak ta a ni. He inremna hi NKorea state guesthouse Paekhwawon-ah an ziak a, South Korea lamah pawh live-in tihchhuah a ni. Inremna an ziah dan kimchang erawh puanzar a ni lo.

Ram pahnihte hian an inkar boruak ṭha lo tihziaawmna turin ram pahnih sipaite thawhdunna tur inremna pawh an ziak bawk a, mahse he inremna ziah pawh hi kimchanga puanzar a ni lo. Sipaite thawhdunna tur inremna hi ram pahnih sipai hotu ve ve ten an ziak a ni.

South Korea President Moon chuan Kim Jong-un chuan an rama missile testing leh launch site pui ber pakhat chu, Tongchang-ri site khar a remti niin a sawi. Hei bakah hian Yongbyon nuclear facility pawh khar a remti bawk niin a sawi. Ram pahnihten inremna an siam chu hmasawnna ropui tak a nih tih sawiin, Korean peninsula-a sipaite inkara remna leh muanna a awm theihna tur pawimawh tak a ni, a ti.

Kim Jong-un pawhin Seoul tlawh thuai a tum thu a sawi a, a zin a nih chuan NKorea ram hruaitu zinga Seoul tlawh hmasa ber a ni ang.

Ram pahnihte hian tunhnaiah an inlaichinna siamṭhat tumin kawng hrang hrangin hma an lo la tawh a, rel hmanga inkalpawhna siam an tum thute puangin, healthcare lama thawhdunna tur leh, Korea indo avanga chhungkaw inṭhendarhte inhmuhkhawmna hun tam zawk siamte pawh an lo rel tawh a ni.