ICC in Myanmar-a pawikhawihna thleng zirchiang dawn

International Criminal Court (ICC) chuan Myanmar-a Rohingya Muslim-te laka pawi-khawihna lian tak thlenga Myanmar puhna zirchianna tur preliminary examination a nei dawn ta.

ICC in Myanmar puhna a zirchianna aṭang hian Myanmar sipaite beihpui thlakna avanga Rohingya mi sang tel thah an nih leh, mi nuai sarih vel an tlanchhia nia sawi chungchangah full investigation a neih theih phah dawn a ni.

Hetih lai hian Myanmar chuan UN report-in civil mi tam tak thah an nih chungchangah Myanmar sipai hotute mawhphurtua puh chhui chian a phutna chu a lo hnawlsak thung.

Myanmar sipaite hian Rohingya chunga tawrhna nasa tak thleng chungchanga thil dik lo tia puhna lakah a lo insawifihlim tawh a, mahse sipaite report hi human rights group-te chuan sawiselin, an landah tihṭhat an tumna mai niin an puh.

Sipaite hian nikum khan Rakhine state-a Rohingya helten police post an beih hnuah beihpui an thlak a, Rohingya mi nuai tel chu Bangladesh ramah an tlanchhia a ni. Sipaite hian pawisawi lo civil mite pawh bitum vekah puh an ni a, hei bakah inthah, pawngsual leh ram halsakte pawh a thleng nasa hle nia sawi a ni bawk.

ICC prosecutor Fatou Bensouda chuan Myanmar-a thil thlen dan zirchian hmasak chu a tum tih sawiin, hemi hnu hian ICC hian dan ang takin a chhui zui leh thei dawn a ni. Civil mite chungah sipaite rawng takin an che nia puhna leh, Rohingya Musli mi tam takin an in leh lo an tlanchhiatsan nia sawite chu a zirchiang dawn tih a sawi.

Myanmar hi ICC-ah hian tel lo mah se, judge-te chuan Bangladesh chu ICC member a nih avangin Rohingya mite chunga pawikhawihna thleng nia sawi chungchang hi court hian a ngaihtuah thei niin an sawi a ni.