Suu Kyi thubuai February 14-ah ngaihtuah dawn

Myanmar sipai sorkar court chuan kum 2020-a an ram inthlanpui neiha thil dik tawk lo tia Aung San Suu Kyi puhna thubuai chu February 14 hian a ngaihtuah dawn.

Sipaiten thuneihna an chan hnuah Suu Kyi hi thubuai ṭhahnem tak siamsak a ni tawh a, a thubuai ṭhenkhatah chuan thiam loh chantir ni tawhin, kum ruk tang tura hrem a ni tawh. Mahse ram dangte chuan a chungthu relsak a nih dan hi an pawm lo a ni.

Kum 2020 inthlana Suu-i party, National League for Democracy (NLD) in hnehna an chan chungchangah, sipaite chuan dik lo taka thiltiah an puh a ni. Mahse an puhna hi Suu Kyi chuan a pha.

Kum 76 mi, Suu Kyi hi an chak theihna atan vote thlak laia election commission thununah puh a ni. President hlui leh a thawhpui Win Myint leh cabinet member hlui Min Thu-te pawh he thubuai vek siamsak an ni bawk. An pathum hian penal code section 130-A hnuaiah thubuai siamsak niin, kum thum thleng lungin an tan theih bakah pawisa chawitir theih an ni.

Suu Kyi hian a thubuai hrang hrangah hian thiam loh a chang vek a nih chuan a belhkhawmin kum 100 chuang a tang thei dawn a ni.

Sipaite hian kum 2020 inthlana NLD-in hnehna an chan ṭum khan inbumna a awm nia sawiin election commission-ah an complaint a, mahse commission lam hian an complaint hi a ngaih pawimawh sak loh avangin nikum February 1 khan sipai chakna hmangin civil sorkar thuneihna an hnehchhuh zui ta a ni. NLD erawh chuan inthlanah hian tihdik loh an neih loh thu an sawi thung.

Suu Kyi hi February 1-a sipaite'n civil sorkar an paihthlak hma darkar rei loteah man a ni a, pawn chhuak thei loin hren zui a ni. Hemi hnu hian sipai lam hian thubuai hrang hrang a siamsak belh zel a, hei hi politics a khelh chhunzawm theih lohna tura sipaite ruahmanna nia ngai pawh an awm. A thubuaite hi mipuite hriat lohin ngaihtuah a ni ṭhin a, a lawyer-te pawh mipui hnenah engmah puanzar lo turin hrek an ni bawk.