Islamabad HC-in Nawaz Sharif-a jail aṭangin chhuah tir

Pakistan-a Islamabad High Court chuan an ram prime minister hlui, Nawaz Sharif, a fanu Maryam leh a makpa Capt (retd) Muhammad Safdar-te chu jail-a aṭanga chhuah tir turin thupek a tichhuak.

Eiruk thubuaia thiam loh chantira jail tantir mek, Nawaz Sharif leh a chhungte hian London-a luxury flat an leina kaihhnawiha thiam loh chantir an nihna hi ngaihtuah ṭha turin court-ah an thlen a ni. Nilaini khan Islamabad High Court-a judge pahnih awmna bench chuan petition an thehluh hi ngaihtuahin, jail tang tura hremna pek chu a tihtawp sak ta a ni.

Kumin July 6 khan accountability court judge Mohammad Bashir chuan Avenfield property case-ah Sharif, Maryam leh Safdar te hi kum 11, kum riat leh kum khat tang turin a lo hrem tawh a ni. Mahse Islamabad High Court chuan he hremna pek tawh hi hnawlin, PM hlui leh a chhungte hi an tan mekna, Rawalpindi-a Adiala Jail aṭanga chhuah turin a ti ta a ni. Court chuan an pathum hian bail bond Rs 500,000 thehlut turin a ti bawk.

Court chuan National Accountability Bureau in an ngenna chungchanga thutlukna siam hmasa tura a ngenna pawh a hnawlsak a, bench chuan NAB lawyer-te chu thil an tihkhawtlai avangin sum chawi turin a ti bawk. Thawhṭanni khan Supreme Court chuan Sharif-a te petition ngaihtuah a remtih avangin Islamabad High Court a khin letna chu a hnawlsak a, Chief Justice Saqib Nisar chuan NAB petition thehluh chu awmze nei ṭha tawk lo nia sawiin, Sharif-a hi Avenfield apartment neitu a nihna finfiahna an pe thei lo niin a sawi, anti-corruption watchdog hi Rs 20,000 chawi turin a ti bawk a ni. Nilaini-a Sharif-a leh a chhungte petition thehluh ngaihtuah a nih lai hian court-ah hian Sharif-a party, Pakistan Muslim League-Nawaz (PML-N) hruaitu eng emaw zat an tel a ni.

Nikuma Panama Paper leak-ah khan Sharif te chhungkaw hming hi a lang tel a, hei vang hian Supreme Court chuan prime minister a nihna aṭangin a bang a, an lakah eiruk thubuai thehlut turin a ti zui bawk. NAB hian Supreme Court thupek ang hian PM hlui leh a fate lakah hian eiruk thubuai pathum an ziaklut a, heng zingah hian Avenfielf property case pawh hi a tel.