Malaysia PM hluiin thubuai neih belh

Malaysia Prime Minister hlui Najib Razak chuan state investment fund sum tam tak tak eirua puhna kaihhnawihah leh a thuneihna hmang dik loa puhnaah thubuai thar pahnih a neih belh leh.

PM hlui Najib hi Nilaini khan anti-graft agency chuan a mimal bank account-a dollar maktaduai 681 a transfer chungchangah an man a, nimin tlai lam khan court-ah kalpui a ni. Police kutah dah mek a ni.

National deputy police chief Noor Rashid Ibrahim chuan Najib-a lakah hian dik lo taka sum dawng leh hmanga puhna kaihhnawiha thubuai 21 buatsaih a ni tih a sawi. Hei bakah hian Malaysian Anti-Corruption Commission Act-a Section 23 hnuaiah thubuai eng emaw zat a hmachhawn dawn bawk.

Najib hian kum 2009-a thuneihna a chan khan state investment fund, 1MDB fund hi a din a, hei hi an ram economy siamṭhatna tura a duan a ni. Mahse kum 2015 khan he fund aṭanga dollar maktaduai 681 vel chu Najib-a mimal bank account-ah transfer a ni tih hriatchhuah a ni a, hei vang hian bang tura nasa taka nawr zui a ni bawk. Kum 2016 khan Najib-an attorney general thar a ruat chuan sum tichinpena puhna lakah Najib hi a fihlim thu sawiin, sumte chu Saudi Arabia lal chhungkua-te donation pek anih thu leh, a tam zawk chu pekkir a nih thu a sawi. Mahse a thusawi hi mi tam takin an ring lo hle thung.

US investigator-te chaun Najb leh a thurualpuite chuan fund aṭang hian dollar tluklehdingawn 4.5 vel an tichingpen niin an sawi. 1MDB fund tihchingpen vanga mipuiten lungawi lohna an lantir avangin May 9 khan Najib-a kaihhruai ṭangrual sorkar chu paihthlak a ni a, kum 1957-a Britain aṭanga Malaysia a independence hnuah a ṭum khatna atan thuneihna changtu party an inthlak a ni.