Russia ralthuam a lei vangin US-in China hrek
China-in Russian military jet leh surface-to-air missile a lei vangin US chuan China sipaite hrekna tur a siam thar nghal.
US chuan China-in ralthuam a lei hi Ukraine chunga Russia chet dan leh, US politics-a inhnamhnawiha puh a nih chungchang avanga Russia hrekna kalpui mek nena inkalh a ni, a ti. China hian tunhnaiah Russian Sukhoi-35 fighter jet 10 leh S-400 missile a lei a ni.
China hian US leh a thurualpui ramten kum 2014 aṭanga Russia hrekna an siam hi a zawm ve lo a ni. Tun thla tira Russian war games neihah pawh khan a tel a ni.
Kum 2014-a Russia-in Ukraine aṭanga Crimea ram a laksak aṭanga khan US leh Russia inkar boruak hi a chhe chho hle. Hei bakah hian kum 2016-a US President thlanna neihah khan Russia chu inrawlhah puh a ni bawk a, Syria tualchhung indona thleng mekah pawh Syria sorkar lam thlawpin Russia sipaite chuan beihpui an thlak fo bawk.
US hian Countering America's Adversaries Through Sanctions Act (Caatsa) hnuaiah China hi a hrek dawn a, an bitum ber chu Russia zawk a ni tih official chuan a sawi bawk. Caatsa hnuaia hrekna an siam hi ramdangte defence lama an theihnate te tihnep sak tumna a ni lo tih sawiin, dik lo taka a lo chet tawh avanga Russia tawrhtir an tumna ber a ni, a ti.
US-in hrekna a siam hian China Equipment Development Department (EDD) leh a hotu, Li Shangfu te a huam dawn a, EDD leh Li hi Blocked Persons List-ah telh an ni. Hei vang hian US-a an thil neihte chu khawih chet theih loha hreksak an ni ang a, sumdawnna lamah America mite an thawhpui khap an ni bawk. Hei bakah hian EDD chu export licence pek a ni dawn lo a, American financial system-ah telh a ni lo bawk ang. US chuan Russian military leh intelligence nena inkaihhnawihna nei, mimal leh pawl 33 te chu blacklist-ah a telh bawk a ni.
Hetihlai hian Russia lam chuan US hrekna siam hian fighter jet leh missile an hralhchhuahna kawngah nghawng a nei dawn lo niin a sawi thung. Parliament member Franz Klintsevich chuan China tan an ralthuam lei ang neih chu thil pawimawh tak a ni, a ti.
Asia ramte hi Russia ralthuam siam leitu pawimawh tak an ni a, kum 2000 aṭang khan Russia ralthuam thawnchhuah zinga 70% vel zet hi Asia khawmualpuiah thawn a ni.