Trump-an Sahara-a bang siam turin Spain hnenah rawtna thlen

US President Donald Trump chuan Spain sorkar hnenah dan loa pemlut vanga harsatna an tawh ṭhin chinfelna turin Sahara thlalerah ramri daidanna bang siam turin a rawtpui.

Kumin June thlaa US tlawhtu, Spain foreign minister Joseph Borrell chuan President Trump hian an inkawm ṭumin he rawtna hi a siam niin a sawi a, mahse hei hi a pawmpui lo tih a sawi thung.

Trump hian US president thlan dawna a campaign-naah khan US leh Mexico ramri hungna bang siam alo tiam tawh a, he a thutiam tihlawhtling tur hian hma pawh a la mek a ni. US leh Mexico ramri hi mel 1,954 (km 3,145) a thui a ni a, Sahara thlaler hi mel 3,000 zeta zau a ni thung.

Spain hian Sahara chungah hian thuneihna nei lo mah se, north African coast-ah enclave pahnih Ceuta leh Melilla erawh a nei thung. Hengte hi Africa aṭanga Europe rama pemluh tumten an pan nasa hle. Kumin January thla aṭang khan Spain-ah hian document mumal nei loa pem lut hi 35,000 vel zet an tling a, hei hi EU ram zingah pemlut an tamna ber a ni.