Iran Revolutionary Guard-te beihnaah mi 24 thi

Iran Revolutionary Guard-ten kar kalta Inrinni-a an ram hmarthlang lam, Ahvaz-a military parade an neih laiin silai kengten an bei a, mi 24 an thi. Thi zinga 12 hi Revolutionary Guard member an ni.

Ahvaz khuaah hian kum 1980-88 Iran leh Iraq indona hriatrengna hun hmanga official te punkhawmna hmun chu silai kengte hian miliary parade neih laiin an bei a, mi 24 an thih bakah midang 60 chuangin hliam an tuar. Military parade hi Iran khawpui Tehran leh Bandar Abbas-ah pawh neih a ni.

Arab opposition movement Ahvaz National Resistance chuan Revolutionary Guard beitute an nih thu hi an sawi. Pawikhawihtu zinga pali hi kahhlum nghal an ni. Islamic State (IS) firfiakte chuan pawikhawihtu niin an inchhal bawk.

State news IRNA agency chuan pawikhawihna thlenga thi zingah hian hmeichhia leh naupang an tel niin a tarlang. Pawikhawihtuah Sunni Muslim helte a puh a ni. Iran military thupuangtu chuan pawikhawitute hi Gulf Arab ram pahnihah training an nei a, US leh Israel nen pawh inzawmna an nei niin a sawi.

Iran Supreme Leader Ayatollah Ali Khameini pawhin he pawikhawihna hi US leh a thurualpuite nena inzawmna nei niin a puh. "He thil hi US leh a thuhnuaia a dah ramten an ruahman a ni a, an tum ber chu kan ram himna tihchhiat a ni", a ti. Iran Foreign Minister Javad Zarif pawhin ramdang sorkar thiltih a ni tih a sawi bawk.

Revolutionary Guard-te hi Iran ramah armed military force thiltithei leh chak ber an ni. 1979 Iran Revolution zawhhnu, kum 1979 April 22-ah Khameini thupek anga din a ni. Sipai dangte ang loin ramri ven hna leh, ramchhunga dan leh thupek kenkawh lam thawk loin Islamic Republic System venghim tura din a ni. Revolutionary Guard hnuaiah hian sipai 125,000 vel an awm a, ground, aerospace leh naval force an awm tel a ni.