Maldive president thar tur thlang

Maldive President thar tur thlangin nimin khan mipuiten vote an thlak.

Zing dar 8 aṭangin vote thlak ṭan a ni a, vote thlak ṭan hma lawk hian police-te chuan eptu pawl campaign headquarters an dapsak nia sawi a ni. President thlannaah hian president ṭanglai Abdulla Yameen leh eptu pawl Maldivian Democratic Party (MDP), candidate Ibrahim Mohamed Solih ten an chuh a ni.

President Yameen hian inthlan hma hian a elpui thawm nei lian deuhte chu a man loh leh, an ram aṭangin a hnawhchhuak a, hei vang hian nimina inthlanah pawh hian hnehna a chan chhunzawm leh rin a ni. Foreign monitor leh eptute chuan eptu pawl leh media chunga a chet danah sorkar hi an sawisel fo a, ramdangte pawh inthlan result hi pawm lo turin an ngen a ni.

Mipuiten Maldive president atana an thlan lal hmasak ber, tuna Sri Lanka rama tlanchhe mek Mohamed Nasheed chuan inthlan result hi hnawl turin ramdangte a ngen a, "Eptu pawl zawng zawngte hi President Yameen dodalin an ṭangrual vek a, a tan hnehna chan ngaihna a awm lo. Mahse inthlan result puan erawh chu ballot box-a vote tlak dan nen a inang dawn lo a ni", a ti. Nasheed hian inthlan hi chuh ve tum mah se Maldives election commission chuan 2015-a firfiaka chetna kaihhnawiha thiam loh chantir a nih chungchangah a disqualify a ni.