Russia-ah pension kum tihsan duh loin kawng zawh

Russia sorkarin pension kum, mipaah kum 60 aṭanga 65-ah tihsan leh, hmeichhiaah kum 55 aanga 60-a tihsan a tumna chu duh loin kar kalta Inrinni khan ram chhung hmun hrang hrangah mipuiten kawng an zawh.

Kawngzawh hi Communist Party leh pawl dangte huaihawt niin, Moscow-ah chuan mi sing tel an tel a ni. Communist Party hruaitu Gennady Zyuganov chuan sorkar chu a rawtna siamte titawp turin a ngen. Khawpui hrang hrangah kawngzawh hi boruak muanawm tak hnuaiah neih a ni a, buaina lian tham chhuak a awm hriat a ni lo.

September 9 khan eptu hruiatu, Alexei Navalny kaihhruaiin pension kum tihsan tumna duh lo hian kawngzawh huaihawt a lo ni tawh a, hemi ṭum hian police-te chuan mi 800 chuang an man a ni. Navalny hi jail-ah a tang mek a, vawiin hian chhuah a ni ang.

Russia sorkarin pension kum tihsan a tumna hi ramchhunga pawl hrang hrangte chuan a duh lo hle a, he ruahmanna siam vang hian President Vladimir Putin-a duhtu pawh 15% zetin a tlakhniam phah tawh a ni. Russia mi tam tak chuan pension kum tihsan a nih chuan pension hnua hamṭhatna an dawn tur hian an dam rei tawk loh an hlauh tih an sawi a, hemi rual hian ṭhalai zawkte chuan pension har chuan ṭhalai zawkte tana hna thawh tur an luahkhah rei sak dawn niin an ngai bawk.

Hetihlai hian President Putin chuan an ram mipuite dam chen kum a san chhoh zel avangin pensioner te hamṭhatna pek kawngah sorkar sum a hek chho hle dawn tih a sawi a, hei vang hian a kum zat thlak hi a ngai a ni, a ti.